تمہارا کرتی ہیں ہروقت انتظار آنکھیں

*تمھارا کرتی ہیں ہر وقت انتظار آنکھیں*

*ہمیشہ راستہ تکتی ہیں بے قرار آنکھیں*

*رسول پاک کے بیٹے کے انتظار میں ہیں*

*اس انتظار پہ کرتی ہیں افتخار آنکھیں*

*تم آو تو یہ تمھیں  دیکھ کر کریں افطار*

*تمھارے ہجر میں رہتی ہیں روزہ دار آنکھیں*

*میں سو بھی جاوں تو یہ جاگتی ہی رہتی ہیں*

*ہیں انتظار کے خیمے کی پہریدار آنکھیں*

*تمھاری دید کی خواہش ہے جنکی پلکوں پر*

*فقط وہی ہیں زمانے میں باوقار آنکھیں*

*مرے امام ،  میں اپنے شکستہ دل کے ساتھ*

*تمھاری راہ میں کردونگا اب نثار آنکھیں*

*کہاں ہے فاطمہ زھرا کی آنکھ کا تارہ*

*یہ مجھ سے پوچھتی رہتی ہیں بار بار آنکھیں*

*پس حیات بھی رہتی ہیں منتظر تیری*

*قضا کے آنے سے کب مانتی ہیں ہار آنکھیں*

*بہار دیکھے ہوئے بھی گزر گئیں صدیاں*

*تمھارے آنے پہ دیکھینگی اب بہار آنکھیں*

*رضا ، امام جو ہمکو نظر نہیں آتے*

*سبب ہیں اسکا ہماری گناہگار آنکھیں*

حسن رضا بنارسی