آمد شبیر سے پھیلی ہے ایسی روشنی

*آمدِ شبیر سے پھیلی ہے ایسی روشنی*

*جس کے آگے چاند سورج کی ہے  پھیکی روشنی*

*حضرتِ شبیر نے گل کر دیئے سارے چراغ*

*پھر بھی ہے خیمے میں ہر سو روشنی ہی روشنی*

*جھک کے سورج بھی سلامی دے رہا ہے بار بار*

*ہے جناب جون کے چہرے پہ ایسی روشنی*

*پھر یزیدی تیرگی میں رہ نہ پایا چین سے*

*بھا گئ کچھ اسقدر حر کو حسینی روشنی*

*خیمہ شبیر میں ہے حر کا آنا ہی دلیل*

*فاطمہ کے چاند نے فکروں کو بخشی روشنی*

*درمیانِ حق و باطل کھینچ دی شہ نے لکیر*

*ورنہ ظلمت کو یہ دنیا کہتی رہتی روشنی*

*بغض حیدر کے اندھیرے میں ہوئے ہیں جو جواں*

*ان کو کیا معلوم ہو ہوتی ہے کیسی روشنی*

*فاطمہ کا چاند جب عرش سناں پر آ گیا*

*کربلا کے دشت میں تب اور پھیلی روشنی*

*نوک نیزہ سے سر شبیر نے آواز دی*

*خنجروں سے کٹ نہیں سکتی کبھی بھی روشنی*

*تم یزید نحس کے ہو اور ہم شبیر کے*

*ہے تمہاری تیرگی اور ہے ہماری روشنی*

*ماتم شبیر بھی کر ، سجدہ خالق بھی کر*

*چاہئے گر کربلا کی پوری پوری روشنی*

*چاند تارے دے رہے ہیں روشنی کونین کو*

*فاطمہ کے چاند سے لیکر ذرا سی روشنی*

*تیرگی فوج ستم کی آنکھ سے رونے لگی*

*بے زباں کے ہونٹ سے جب مسکرائ روشنی*

*اس لیئے خاک شفا ہم قبر میں بھی لے گئے*

*تاکہ ہو جائے ہماری قبر میں بھی روشنی*

*جس زمیں میں دفن ہے چاند آپ کا اے فاطمہ*

*اس زمیں کی دے رہی ہے ساری مٹی روشنی*

*تیرگی ظلم میں وہ رہ نہیں سکتا رضا*

*جس بشر کو مل گئ ہے کربلائ روشنی*